ಉತ್ತರಪ್ರದೇಶ; ಇತ್ತೀಚಿನ ಯುಪಿ ಸ್ಥಳೀಯ ಪಂಚಾಯತ್ ಚುನಾವಣೆಯಲ್ಲಿ ರಾಜ್ಯದ ಪಶ್ಚಿಮ ಭಾಗದಲ್ಲಿ, ವಿಶೇಷವಾಗಿ ಮೀರತ್, ಗಾಜಿಯಾಬಾದ್ ಮತ್ತು ಸಹರಾನ್‌ಪುರ ವಿಭಾಗಗಳಲ್ಲಿ ಯೋಗಿ ಅಲೆ ಕೈಕೊಟ್ಟಿದ್ದು ಪುರಸಭೆಯ 90 ಸ್ಥಾನಗಳಲ್ಲಿ ಕೇಸರಿ ಪಕ್ಷವು 64 ಸ್ಥಾನಗಳನ್ನು ಕಳೆದುಕೊಂಡಿದೆ.
ನಗರ ಪಾಲಿಕೆ ಮತ್ತು ನಗರ ಪಂಚಾಯತ್ ಮಟ್ಟದಲ್ಲಿ ಯೋಗಿ ಅಲೆ ಮಖಾಡೆ ಮಲಗಿದೆ.ಗ್ರಾಮೀಣ ಮತ್ತು ಅರೆನಗರ ಪ್ರದೇಶಗಳಲ್ಲಿ ಯೋಗಿ ಆದಿತ್ಯನಾಥ್ ಅವರ ಮ್ಯಾಜಿಕ್ ಕೆಲಸ ಮಾಡಲಿಲ್ಲ ಎಂದು ಅಂಕಿಅಂಶಗಳು ತೋರಿಸಿದೆ.
ಮೀರತ್-ಸಹಾರನ್‌ಪುರ ವಿಭಾಗದಲ್ಲಿ ಮೇಯರ್ ಸ್ಥಾನ ಹೊರತುಪಡಿಸಿದರೆ ಬಿಜೆಪಿಯ ಯಾವ ಜಾದೂ ನಡೆಯಲಿಲ್ಲ. ಪುರಸಭೆಯ 90 ಸ್ಥಾನಗಳಲ್ಲಿ ಕೇಸರಿ ಪಕ್ಷವು 64 ಸ್ಥಾನಗಳನ್ನು ಕಳೆದುಕೊಂಡಿತು ಮತ್ತು ಎರಡೂ ಮಂಡಲಗಳಲ್ಲಿ ಪಂಚಾಯಿತಿ ಅಧ್ಯಕ್ಷ ಸ್ಥಾನಗಳನ್ನು ಕಳೆದುಕೊಂಡಿದೆ.
ಬಿಜೆಪಿ ಅಭ್ಯರ್ಥಿಗಳು ಕೇವಲ 26 ಸ್ಥಾನಗಳಲ್ಲಿ ಮಾತ್ರ ಗೆಲ್ಲಲು ಸಾಧ್ಯವಾಯಿತು ಮತ್ತು ಸ್ವತಂತ್ರ ಅಭ್ಯರ್ಥಿಗಳು ಬಾಗ್‌ಪತ್, ಮುಜಾಫರ್‌ನಗರ ಮತ್ತು ಗಾಜಿಯಾಬಾದ್‌ನಂತಹ ನಗರಗಳಲ್ಲಿ ಅಭೂತಪೂರ್ವ ಗೆಲುವು ಸಾಧಿಸಿದೆ.
ಬಿಜೆಪಿಯ ಪ್ರಚಾರವು ಯೋಗಿ ಆದಿತ್ಯನಾಥ್ ಅವರ ಆಡಳಿತದ ಪ್ರಭಾವ ಮತ್ತು ಯೋಜನೆಗಳ ಪ್ರಯೋಜನಗಳ ಮೇಲೆ ನಡೆದಿದೆ.ಆದರೆ ಅದು ಮತಗಳಾಗಿ ಪರಿವರ್ತನೆಯಾಗಲು ಸಾಧ್ಯವಾಗಲಿಲ್ಲ.
ಕೆಲವೆಡೆ ಟಿಕೆಟ್ ಆಕಾಂಕ್ಷಿಗಳ ಜೊತೆ ಬಿಜೆಪಿ ವರ್ತಿಸುವ ವಿಧಾನವೇ ಬಿಜೆಪಿ ಸೋಲಿಗೆ ಕಾರಣ ಎನ್ನಲಾಗುತ್ತಿದ್ದು, ಹಂಚಿಕೆ ವಿಚಾರದಲ್ಲಿ ಪಕ್ಷದಲ್ಲಿ ಭಾರೀ ಕೋಲಾಹಲ ಉಂಟಾಗಿತ್ತು. ಟಿಕೆಟ್ ಹಂಚಿಕೆಯಲ್ಲಿ ಹಣದ ವಿನಿಮಯದ ಬಗ್ಗೆ ಬಹಿರಂಗ ಆರೋಪಗಳಿವೆ. ಬುಲಂದ್‌ಶಹರ್‌ನಲ್ಲಿ, ಬಿಜೆಪಿಯು ಒಂದು ವರ್ಷದ ಹಿಂದೆ ಪಕ್ಷಕ್ಕೆ ಸೇರಿದ ಅಭ್ಯರ್ಥಿಗಳಿಗೆ ಟಿಕೆಟ್ ನೀಡಿದೆ ಎಂದು ಕೂಡ ಆರೋಪ ಕೇಳಿ ಬಂದಿತ್ತು.
