ಮೊರಾಕ್ಕೊದಲ್ಲಿ ನಡೆದ ಪ್ರಬಲ ಭೂಕಂಪ 2900ಕ್ಕೂ ಹೆಚ್ಚು ಜನರ ಬಲಿ ಪಡೆದು, 5 ಸಾವಿರಕ್ಕೂ ಹೆಚ್ಚು ಜನರನ್ನು ನಿರಾಶ್ರಿತರನ್ನಾಗಿ ಮಾಡಿದೆ.
ಆದರೆ ಭೂಕಂಪಕ್ಕೂ ಮೊದಲು ಆಗಸದಲ್ಲಿ ಬೆಳಕು ಮೂಡಿತ್ತು ಎಂದು ಜನರು ಹೇಳುತ್ತಿದ್ದಾರೆ.
ಭೂಕಂಪನದ ತೀವ್ರತೆ ರಿಕ್ಟರ್ ಮಾಪನದಲ್ಲಿ 6.8ರಷ್ಟಿತ್ತು.
ಕಂಪನದ ತೀವ್ರತೆಯಿಂದ ಹಲವು ಕಟ್ಟಡಗಳು ನೆಲಸಮವಾಗಿತ್ತು. ಆದರೆ ಈ ಕಂಪನಕ್ಕೂ ಕೆಲ ಕ್ಷಣ ಮೊದಲು ಆಗಸದಲ್ಲಿ ಬಣ್ಣ ಬಣ್ಣಗಳ ಬೆಳಕು ಮೊರಾಕ್ಕೊದ ವಾಯವ್ಯ ಭಾಗದಲ್ಲಿ ಕಾಣಿಸಿಕೊಂಡಿರುವುದು ವಿಜ್ಞಾನಿಗಳಲ್ಲೂ ಕುತೂಹಲ ಮೂಡಿಸಿದೆ.
ಅಮೆರಿಕದ ಭೂಭೌತ ವಿಜ್ಞಾನಿ ಜಾನ್‌ ಡೆರ್‌.ಭೂಂಕಪ ಮತ್ತು ಆ ಸಂದರ್ಭದಲ್ಲಿ ಮೂಡುವ ಬೆಳಕು (ಅರ್ಥ್‌ಕ್ವೇಕ್‌ ಲೈಟ್‌, ಇಕ್ಯೂಎಲ್‌) ಕುರಿತು ಹಲವು ಸಂಶೋಧನಾ ಪ್ರಬಂಧಗಳನ್ನು ಬರೆದಿದ್ದು, ಇದು ನಿಜ ಎಂದು ಹೇಳಿದ್ದಾರೆ.
ಭೂಕಂಪನ ಸಂಭವಿಸಿದ್ದು ರಾತ್ರಿ ವೇಳೆಯಲ್ಲಾದ್ದರಿಂದ ಈ ಬೆಳಕು ಹೆಚ್ಚು ಸ್ಪಷ್ಟವಾಗಿ ಕಾಣಿಸಿದೆ ಎಂದು ಅವರು ಹೇಳಿದ್ದಾರೆ. ಭೂಕಂಪನ ಬೆಳಕಿನ ವಿಡಿಯೊಗಳನ್ನು ಹಲವರು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದಾರೆ. ಅದರ ಕುರಿತು ಅಚ್ಚರಿ ವ್ಯಕ್ತಪಡಿಸಿದ್ದಾರೆ.
ನಲವತ್ತು ವರ್ಷಗಳ ಹಿಂದೆ ಈ ಬೆಳಕಿನ ಕುರಿತು ವಿವರಿಸುವುದೇ ಕಷ್ಟವಾಗುತ್ತಿತ್ತು. ಹೀಗೊಂದು ಪ್ರಕ್ರಿಯೆ ನಿಸರ್ಗದಲ್ಲಿ ನಡೆಯುತ್ತದೆ ಎಂದರೆ ಯಾರೂ ನಂಬಲು ಸಿದ್ಧರಿರುತ್ತಿರಲಿಲ್ಲ. ಆದರೆ ಈಗ ಸಿಸಿಟಿವಿ ಕ್ಯಾಮೆರಾ, ಮೊಬೈಲ್ ಕ್ಯಾಮೆರಾಗಳು ಇರುವುದರಿಂದ ಸುಲಭವಾಗಿ ಇಂಥ ಪ್ರಕ್ರಿಯೆಗಳು ದಾಖಲಾಗುವುದರಿಂದ ವಿವರಿಸುವುದೂ ಮತ್ತು ಅಧ್ಯಯನವೂ ಸುಲಭವಾಗಿದೆ ಎಂದು ಡೆರ್‌ ಹೇಳಿದ್ದಾರೆ.
ಕೆಲವೊಮ್ಮೆ ಈ ಬೆಳಕು ಇವು ಮಿಂಚಿನಂತೆ ಕಂಡು ಬರುತ್ತವೆ.ಬೆಳಕು ಬೇರೆ ಬೇರೆ ಬಣ್ಣಗಳಲ್ಲಿ ಕಾಣಿಸಿಕೊಳ್ಳುತ್ತವೆ. ಇನ್ನೂ ಕೆಲವೊಮ್ಮೆ ಆಗಸದಲ್ಲಿ ವೃತ್ತಾಕಾರದ ಬೆಳಕಿನಂತೆ ಕಾಣಿಸಿಕೊಳ್ಳುತ್ತದೆ. ಕೆಲವೊಮ್ಮೆ ಸಣ್ಣ ಜ್ವಾಲೆಗಳು ಮಿನುಗಿದಂತೆ, ನೆಲದಿಂದಲೇ ದೊಡ್ಡ ಜ್ವಾಲೆ ಆಗಸದೆತ್ತರಕ್ಕೆ ಹಬ್ಬಿದಂತೆ ಕಾಣಿಸಿಕೊಳ್ಳುತ್ತದೆ.
ಈ ರೀತಿ ಬೆಳಕು 5ಕ್ಕಿಂತ ಹೆಚ್ಚು ಕಂಪನದ ತೀವ್ರತೆ ಇರುವ ಸಂದರ್ಭದಲ್ಲಿ ಮಾತ್ರ ಕಂಡುಬರುತ್ತದೆ. ಭೂಕಂಪ ಸಂಭವಿಸುವ ಕೆಲ ಕ್ಷಣಗಳ ಮೊದಲು ಇಂಥ ಬಣ್ಣ ಬಣ್ಣದ ಬೆಳಕು ಆಗಸದಲ್ಲಿ ಮೂಡುತ್ತವೆ. ಇದು ಸುಮಾರು 600 ಕಿ.ಮೀ.ದೂರದವರೆಗೂ ನೋಡಲು ಸಿಗುತ್ತದೆ ಎನ್ನಲಾಗಿದೆ.
